e...

u splitu jemate jedne foje ča se zovu Total Split. tot firme oglašavaju svoje proizvode i usluge. more se nać šta ko radi, di je, koji mu je broj o' telefona, a koji o' mobitela i tako to, e... napomena: dalmatinci su vrlo lini pa su učinili izdanje tih foja i za zagreb i za rijeku.

e sad... sigurno se pitate u kakvoj su vezi slika i ove dvi rige teksta. evo ću van odma reć. prije vengo sve ča van je potribno počnete gledat u novi broj, a ovogodišnji broj počnete duperat za čistit ribu, pogledajte na sami početak tega totala, e... jema na par stranic puno interesantno o Merjanu, napisa je Goran Borčić, a stare slike merjana su iz fototeke Muzeja grada Splita. znači tot morete nać puno zanimljivih informacija, slika, o merjanskin crikvicama, grobljima, znanstvenin institucijama na merjanu, plažama, sportskin objektima itd. ja ću tih par stranic okinit da slučajno ne bi završile u škovace jerbo su vrlo, vrlo korisne i zanimljive, e... a šta je notano za tu sliku gori, a? narafski, spiza je navažnija pa van ja ovod izvlačin o ugostiteljskin objektima na merjanu, e... ovo je sa vrja merjana, a splićani dobro znaju da jema i na bene i na prvu vidilicu i tako dalje, e...

znači gre ovako (šjor Borčiću skužajte me, ali ja ću vaše riči prinit svitu na spliski, e):

na kraju 19. vika se mislilo o izgradnji restoracije na merjanu da bi dolazak gori bija šta ugodniji i sadržajniji, e... i tako je na mistu di je danas Prirodoslovni muzej Split oliti zoološki vrt podignut mali drveni restoran koji se 1909. užga. onda se i jopet mislilo pa se na kraju tot i učinilo novu zgradu.

pinezima Društva Marjan je 1913. učinjen ti novi restoran, a nacrte za njega je napravija Petar Senjanović. 200 kvadratnih metri za balat i balkon za mužiku. pod vodstvon hotelijera Buljevića ta restoracija je postala misto zabave i kulturnih događaja, a svaku nedilju sve do večeri je sviralo tot.

1927. je to misto prikinilo bit restoracija i tot se stivala prirodoslovna zbirka ča ju je postavija Umberto Girometta.

o drugin restoracijama sad neću ovod, jemate total pa povirite, e... nešto drugo van oću reć. ovi iz hepa su vridni, pa osin ča su trenutno raskopali cili grad, danima se i gori kopa i to o' crikvice svetoga nikole pa priko makadama. polaže se kabel u zemlju. jo, kad zasvitli, jemat ćemo atrakciju bolju vengo francuzi oni ajfelov toranj, a valjda će liti bit i života tot, valjda će se jopet čut mužika, valjda će letrika potirat narkomane, kurvetine i pijančine pa da se normalan svit more malo razladit na +40 u ariji, e...

gren ča, čeka me nešto lipo za izist, grijota da se oladi. jemate pozdrav!

notano o' xvii: 30.11.2005., 11:15